Tuesday, December 7, 2010

పాప కళ్ళల్లో ...

వాన వెలిసింది.
అంతపెద్ద ఆకాశంలో
ఇంద్రధనసు
ఏడురంగుల్లో మెరిసింది.
కానీ ......
పాప చిన్ని కళ్ళల్లో
వేయి రంగులతో మెరుస్తోంది.

హైకులు -3

ఆమె కనులు
తడవడమంటేనే
బతుకు సున్నా.
----------------
ఈ రెండు కళ్ళు
తడిసాక తెలిసింది
బతుకు లోతు.
----------------
కంట తడిని
తుడిచే వేళ్ళు౦టేనే
బతుక్కి అర్ధం.
----------------


తుడిచే velluntene

Monday, December 6, 2010

పొన్నచెట్టు నీడలో ..

పొన్నచెట్టు కింద
నిలబడ్డాను.
విరిసిన పూలు కొన్ని,
మరికొన్ని రాలిన పూలు
నాలోని అక్షరాలని
పలకరించాయి.
---కాలం పరిమళిస్తూ
నాకు తోడుగా ఉంది.

Wednesday, December 1, 2010

మోయలేని మనసు ..

హైకులు
======
కనురెప్పలు
తెలియని నదిని
దాచివుంచాయి.
---------------
కన్నీటి చుక్క
లోలోపలి బాధని
ఆరబోస్తోంది.
--------------
కన్నీటి చుక్క
బరువెంతో తెల్సింది
జారిపడ్డాక.
-----------
కంట తడిని
మోయలేని మనసు
చెంపకిచ్చింది.
--------------

Wednesday, November 17, 2010

నా నువ్వు- నీ నేను

నేనుతనంలో నువ్వు,నువ్వుగా నన్నుచేరుకొని ,నేను నేనుగా లేని క్షణంలో
నువ్వు నన్నుగా చేదుకొని ,నా నువ్వుగా ,నీ నేనుగా కలసిన వైనంలో
అనేకనేనులుగా విడిపోతున్న కాలంలో ,నువ్వు ఒక్క సారిగా మేల్కొని
వివిధనేనుల్ని ఏకంచేసి ,ఒకేఒక్క నువ్వు ,ఒకేఒక్క నవ్వుతో నన్నే ముడివేసి
కొన్నివేల నువ్వులుగా మారిన నువ్వు ,అనంత ప్రేమని పంచి ఇచ్చి
ఈ ఒక్క నేనుని అనురాగ ధారల్లో పడవేసి
నేనే నువ్వని- నువ్వే నేనని ,నేనుగా వేరే లేనేలేనని
నీవుగా నాలోలేని నేను, నేనుగా అసలు ఉన్నా లేనని
తెలిసిన అపురూప సమయంలో
నాకు నేనుగా నేకు ఇవ్వనా
అక్షరాలలోపెట్టి ఈ కవితని చిన్ని కానుకగా...!?

Saturday, November 13, 2010

రెండు కట్టెలు ..

యథా కాష్టా౦చ కాష్ట౦చ
సరుయేతాం మహోదదే
సమత్వ చవ్యపే ఏతాం
తద్యద్భూత సమాగ మమ్.
''సముద్రంలో కొట్టుకొస్తున్న రెండుకట్టెలు తడిసి ,
ఒకదానికి ఒకటి అంటుకుపోతాయి. అలా, కొంత దూరం
జంటగా వెళ్ళాక, అలల తాకిడికి, విపరీతమైన గాలికి ,
అవి మళ్ళీ విడిపోతాయి. ఒకటికిఒకటి దూరమై మళ్ళీ కలసుకోవు.
సంయోగ-వియోగాల గురించి వాల్మీకి రామాయణం లోని అద్భుత శ్లోకం .

Thursday, November 4, 2010

బారాటి నీడ...!

వస్తాడన్న సమయానికి
రాలేదన్న సందర్భానికి -మధ్య
తీరని తాపత్రయ అగాధముంది.
వస్తాడన్న ఆశకి
రాలేడన్న వార్తకి -మధ్య
కనిపించని గాయాల బాధ ఉంది
నిన్నటివరకు బాగానే ఉన్నాడు
మళ్ళీ వస్తాననే వెళ్ళాడు
చాలా బారాటి నీడని కన్నీటి వెనుక వొదిలి
ఇప్పుడేమో ఓ జ్ఞాపకం లో ఉండిపోయాడు .

గత నెల తొమ్మిదిన నా మిత్రుడు జాస్తి శ్రీ కృష్ణ వరప్రసాద్ -జాకీ
అమ్మని కూడా వదలి వెళ్లిపోయాడని ,
చాలా 'దూరం ' వెళ్లిపోయాడని తెలిసి
ఇలా అక్షరాలలో వెతుక్కుంటూ ..

Thursday, October 7, 2010

ఖాసీం భాయ్ ..ఓ పావురం..ఓ దీపం

మా పాపకి గాలి సోకితే
మా ఖాసీం భాయ్ తావీదు కడతాడు ..!
ఖాసీం భాయ్ ఇంట్లో కష్టం వస్తే
మరు క్షణం లో నేను నడుం కడతాను...!!
----------------------------
ఓ పావురాయి
మందిరం మీంచి మసీదు మీదికి
మసీదు మీంచి మందిరం మీదికి
చానాళ్లుగా తిరుగుతోంది ..
ఆకలి వేస్తె
నాలుగు గింజల కోసం
ఊరి వైపు ఎగురుతోంది...
------------------
మతములన్ని మాసి పోవును ..
మమతల దీపం నిలిచి వెలుగును ....
--------------------------

Tuesday, September 7, 2010

కొంచెం ...

కుంచె మొన కొంచెం ..
కదిల్తే రంగుల ప్రపంచం..
==============
కాగితం నా పొలం
కలం నా హలం
కవిత అందరి ఫలం ..!
==============
కనురెప్పల దూరం --ఇంత
కనువిప్పుకు లోకం --అనంత
===============
"అ " అంటే అక్షరం
పదాలుగా కదిలితే కావ్యం
==============
ఒంటరిగా నడిస్తే ..అది నడక
నలుగురితో నడిస్తే --అది బ్రతుకు.
==================
కవిత మొదలైనప్పుడు నీది
ముగుసినాక --అందరిది.
===============

Sunday, September 5, 2010

చినుకు

వాన చినుకు
ఎదలోపల పడి
ముంచివేసింది .
************
మంచుమొగ్గలు
గడ్డి పోచలపైన
మెరుస్తున్నాయి .
************
రోజంతా వాన
పనిలో పడి
మునిగింది గది.
*************

చినుకు

Monday, August 23, 2010

జన్మనిచ్చేది ...

జన్మ నిచ్చేది
అమ్మ ఒక్కటే కాదు..
అక్షర౦ కూడా..!
ఈ రోజు నా జన్మ దినం.
యాభై వస౦తాలు నిండిన క్షణం ..
ముందుకు పొతే ముసలి తనం..
వెనక్కి వెళితే పసిడితనం..
ఇలా ఉండిపొతే ఎంత బావుంటుందీ క్షణం..!

Tuesday, August 3, 2010

ఓ పువ్వు రాలుతు౦ది ....

నన్ను ఈ దారినే వెళ్ళనివ్వండి ..
ఇరువైపులా ఎదిగిన చెట్లు
నన్ను గుర్తుపట్టి
ఇంత నీడనీ -కొన్నిపూలనీ ఇచ్చాయి కదా ..!
---నాదోసిళ్ళ లోంచి
కాసిని నీళ్ళు పోసిన జ్ఞాపకం
నీడలా పరచుకుంది కదా ..!
కంచెవేసి కాపలా కాసానని
పూల పరిమాళాలని పంచింది కదా..!!
----నన్ను మోసు కెళ్ళేపుడు
ఈ దారినే వెళ్ళండి ..
ఒక్క క్షణమైనా
ఓ చెట్టు నీడలో ఆపండి.
తప్పకుండా ఓ పువ్వు రాలుతుంది నాపైన.

Sunday, July 4, 2010

వెన్నెలకి తెలుసా?

ఆ రాత్రి
ఏ౦జరిగిన్దొ
జాబిలికి తెలియదు ..కానీ
వెన్నెలకి తెలుసు !
కాటుక కళ్ళని చూసిన
మెరుపుతీగకు తెలుసు !
మల్లెపూలని అడిగితె
జాబిలికే తెలుసు అంటాయి .
ఎరుపెక్కి
బరువెక్కిన ఆమె కళ్ళు మాత్రం
ఎవరికీ ..ఏమీ తెలీదు అంటాయి .

Tuesday, June 29, 2010

కొంత రాత్రయ్యాక ..

కొంత రాత్రయ్యాక చూస్తే
చంద్రుడూ లేడూ..చుక్కలూ లేవు.
చెట్లనిండా ఆవరించిన చీకటి
నేలమీద జారుతోంది.
రేకులనిండా దాచుకున్న వెన్నెలని
ఎవరికైనా ఇవ్వడానికి l
ఓ మల్లెమొగ్గ తహతహలాడుతోంది .
కొంత సేపయ్యాక చూస్తే
రెప్పల చప్పుళ్ళకి ఉలిక్కిపడెంత నిశ్శబ్దం .
అంత నిశ్శబ్దం లోనూ
రాత్రి తెగ తాపత్రయ పడుతోంది..
రేపటి ఉదయాన్ని
రాగరంజితం చేయడానికి.

Sunday, June 20, 2010

ఆ క్షణం

ఉన్నపాటి కొద్ది స్తలంలో
ఓ పూరిపాక ఉండేది.
ఓ దీపం ఉండేది.
నా ముద్ద నేను తినేవాడిని.
కాల గమనం లో అక్కడో భవంతి కట్టాను.
గర్వంగా తలెత్తుకొని వెళ్తే
గుమ్మం తగిలి తలకి బొప్పికట్టింది.
ఎంతకూ తగ్గని నొప్పిని భరించలేక
స్కానింగ్ తీస్తే,
తలలో రక్తం గడ్డ కట్టిందన్నారు.
ఆలోచనలేమీ పెట్టుకోవద్దన్నారు.
.....కానీ
పూరిగుడిసె గుర్తుకొచ్చింది.
దాన్లోని దీపం గుర్తుకొచ్చింది.
నా ముద్ద గుర్తుకొచ్చింది.
తలను వొంచి
నా మానాన నేను బతికిన ఆ క్షణం గుర్తుకొచ్చింది.
'ఈ ఒక్క లక్షణం చాలు
ఎవరైనా మళ్ళీ బతకడానికి' అంటున్నారు .

నది ..అలల సవ్వడి

నది ఆవలి గట్టున ఇల్లు .
అక్కడో దీపం దిగులుగా వెలుగుతోంది .
ఓ అనివార్యపు ఒంటరి సాయంత్రంలో
ఇవతల నేను .
.....నీళ్ళు లేని నది
..... కదలని పడవ
..... గాఢమైన నిరీక్షణ
నదిలోకి నీళ్ళు చేరాలి
అలల అరచేతుల్లో పడవ తేలాలి
ఆవలి ఒడ్డుకు చేరాలి...
అప్పుడు కదా
వాకిట్లో నిలబడి
అలల సవ్వడి వింటూ
నది నుదుటిపై
సూర్య కాంతిని చూడాలి!??
..... ఓ
చినుకు పడింది.
ఇప్పుడు మీకు
నది వస్తున్న చప్పుడు వినబడుతోందా??

Wednesday, June 16, 2010

లేకపోతె..

ఎక్కడినించో
నీళ్ళల్లో కొట్టుకొచ్చిన చీమకి,
ఒడ్డునున్న గడ్డిపోచ
చేయిన౦ది౦చాక..........
-----ఈదురుగాలుల్ని తట్టుకొని
బెదురు చూపుల్తో
ముళ్ళ క౦చలొ చిక్కడిన పిచ్చుక పిల్లకి
పక్కనే పచ్చని గుబురు కనిపించాక .......
------చెలరేగుతున్న ఒ౦టరితనపు మ౦టలతో
విసిగి వేసారినప్పుడు చల్లటి సహచర్యపు
సెలయేటి అలల గలగలలు వినిపించాక.......
ఎవరికీ ఎవరైనా
లేకపోతె నేమి..?
ఒకరికి ఇంకొకరు తోడైనపుడు ...!

Sunday, June 13, 2010

వెతుకులాట ..!

చీకటికి భయపడి
కల్లుమూసుకున్నవారు ,
తళ్ళత్తళ్ళల దివ్య నక్షత్ర కాంతిని
కోల్పోయారు కదా..!
........నిజానికి భయపడి
........వొంగి వొంగి నంగిగా నడిచేవారు,
........అబద్ధపు అశుద్ధ కొలిమిలో
........తగలబడి పొయారుకదా...!
---ఈ రెండింటికీ భయపడక
ఎదురు నిలబడి
జీవితపు అట్టడుగు పొరల్లోని
శూన్యతరంగాల్కి --దివ్య సంగీతాన్ని చేర్చి ,
కొన్ని పాటల్ని కట్టి వెళ్ళారు కదా..!
ఏ ఒక్క పాటైనా
గొంతులో చిక్కడితే
బ్రతుకంతా పాడుకోడానికి
వెనుకాడని క్షణం కోసం .....
ఈ వెతుకులాట...!!!

Friday, June 11, 2010

నీలి తామరలు

అప్పుడేం జరిగిందంటే ....
ఆకాశం మెల్లగా ప్రవహించి
అలవోకగా కోనేటి
అలల్లో వొదిగింది.
---------నీలి తామరలు ఇంకా మెల్లగా
రేకులన్నీ విప్పుకొని
నింగి వైపు చూస్తున్నాయి.

క్షణ కాలంలో ...కాలం
నీలంగా మారి
ఎవరినైనా సరే ...
తనలోకి వొంపు కోవాలని చూస్తోంది.
....కోనేటిలో
.... కొన్ని నీలి తామరల ప్రతిరూపాలు
.... నన్నెందుకు రమ్మంటున్నాయి..!!??

Wednesday, June 2, 2010

చూపులు

తలవాకిట్లో
అమ్మ కళ్ళాపుజల్లి
అలికి ముగ్గులేసినపుడు
నా చూపు
ఓ చుక్కకు గుచ్చుకుంది .
నుదుటిమీద పడే కురుల్ని
అర చేతిని తిరగేసి
అమ్మ-పైకి సర్దుకున్నపుడు
నా చూపు
చిరుచెమటలో తడిసినది.
నా చూపులన్నీ
అక్షరాలకి పెనవేసి
వొకానొక వేకువలో
నన్ను తన చేతుల్లోంచి
నేలమీదకు దించిందని
అమ్మ చూపులు
మసకబారాక తెలిసింది .


Saturday, May 22, 2010

వాన .నేనూ

ఒహటే వాన
ఆవిడా నేనూ
ఒకేచెట్టుకింద
నిలబడిపోయాం
"వాన తగ్గేట్లులేదు -
ఇంటికి వెళ్ళిపోదాం" అంది.
"నేను రాను - ఇక్కడే తడిసిపోదాం " అన్నాను.
తడుస్తూ-వొణుకుతూ
ఓ కుక్కపిల్ల
నా పాదాల్ని నాకుతూ
అప్పుడప్పుడు తలెత్తి చూస్తోంది ..
ఇప్పుడు ..ఎలా వెళ్ళాను???

Sunday, May 16, 2010

కొన్ని పూలు

* పూలకుండీలో
గులాబి మొక్క-రోజూ
పువ్వునిస్తోంది .
----------------------
* తుమ్మెద వచ్చి
ఏదో ఇచ్చి వెళ్ళాక
పువ్వు నవ్వింది .
---------------------
*గొడ్డలి తెచ్చి
చెట్టుకాంచి వెళ్ళాడు
కొమ్మలూగాయి .
--------------------
* పూలు పూయడం
రాలిపోవడం -చెట్టు
ఏదో చెప్తోంది.
------------------
* రాలిపడినా
అలల భుజాలేక్కి
నవ్వుతూ పూలు.
--------------------

Tuesday, May 11, 2010

ఆమె కన్పించింది

చెట్టు కన్పించింది--ఆకుల్లోంచి

జాబిలి కన్పించింది --వెన్నెల్లోంచి

ఆమె కన్పించింది --అక్షరాల్లోంచి

Monday, May 10, 2010

తనేను

నేను తనేను
ఆమెగానే ఉన్నాను
నేనైతే లేను .
************
ఆమె అంటేనే
ప్రపంచమని -లేదా
ఏదీలేదని ..!
************
మౌన భాషిణి
అంతరంగాన ఆమె
రాగ రాగిణి .
**************

Thursday, May 6, 2010

పూలురాలాయి ...!

పూలు రాలాయి
జ్ఞాపకాలు కొమ్మల్లో
మొగ్గలయ్యాయి.
-------------------
పూలు పూచాయి
కొమ్మలు ఊగగానే
రాలిపోయాయి.
-----------------
పూలు రాలాయి
మలిసంధ్య కాంతుల్లో
వేదన చిమ్మింది .
------------------

Friday, April 30, 2010

దారి

నాకు దారంటే ఇష్టం .
పదినప్పుడులేపి -దుమ్ముదులిపి
అమ్మలా నడిపించే దారంటే ఇష్టం.
ఇరువైపులా ఎదిగి
వినయంగా తలలు వంచిన
పూలమోక్కలన్నా ఇష్టమే.
వేనుతిరగని -అలుపెరగని
నా పయనంలో
నీడనిచ్చి-సేదదీర్చి
తలనిమిరి ప్రేమగా సాగనంపే
దారిపక్కని చెట్లన్నా ఎంతోఇష్టం.
దారిపక్కన గట్ట్లని ఒరుసుకుంటూ
ప్రవహించే ఏరన్నా ఇష్టమే.
ఉద్యమిస్తూ -నినదిస్తూ
ఊరేగి౦పులో ఆనవాళ్ళని గుర్తిస్తూ
ఓనమాలు దిద్దించే
అమ్మలాంటి దారంటే చాలా ఇష్టం.

Monday, April 26, 2010

ఏటి ఒడ్డున కాసేపు..

ఏటి ఒడ్డున పూలచెట్టు
మృదువుగా ఊగుతోంది .
ప్రతి అలా
పూలప్రతిరూపాల్ని
అపురూపంగా మోసుకెల్తున్నాయి
ఆవలి ఒడ్డున
అలసి ఆగిన పడవ
తడవ తడవకీ ఉలిక్కి పడుతోంది .
సాయంత్రాన్ని పెనవేసుకుంటూ
చిరుగాలి పరిమళిస్తోంది..
తొలిసంద్యనినెమరేసుకుంటూ
పరవశిస్తూ ఓ కవి ..
ఇరు తీరాలని ముడివేసుకుంటూ
ప్రవహిస్తూ యేరు..
కూటి కెళ్ళిన పక్షులు
గూటికి చేరుతూ కువకువలు..
తగుల్తున్న అలల్లో
జారిన జ్ఞాపకాలని
తడుముకుంటూ
ఏటి ఒడ్డున నేను.





Thursday, April 22, 2010

ధరణి దినోత్సవం

చేలకు గట్లు
సరిహద్దులు గీస్తూ ..
భూమి నవ్వింది .
---------------
బొంగరం
గిర్రున తిరుగుతోంది
భూమి నవ్వుకుంది .
----------------
ఏ కవి చల్లాడో
వేల అక్షరాలు
నేల ,పచ్చని కవిత నిచ్చింది .
-------------------

రంగుల కల

గొంగళి పురుక్కి నిద్ర చెడింది
రంగుల కలలన్నీ
రెక్కలిప్పుకున్నాయి .
------------------
రంగులన్నీ నేలపాలు
పాప అరచేతిలో
ఆధునిక చిత్రం .
----------------
నా ముంగిట్లో మృత్యువు
ఒక్కో రాయి ఏరుతోంది
నా గడియారంపై విసరడానికి.
-------------------


Tuesday, April 20, 2010

కొత్త పల్లవి

యవ్వనం
ఓ భీభత్స రస ప్రధాన గీతిక
ఎప్పుడూ కొత్త పల్లవినే రాసుకుంటుంది .
--------------------
చందమామ
సంద్రమై పొంగింది
వెన్నెల్లో ఆడుకునే ఆడపిల్లల్ని చూసి.
--------------------
స్నేహం
ఓ వింతగాయం
ఇద్దరికీ ఒకే చోట తగిలి మాయమైంది .
--------------------

Tuesday, April 13, 2010

వెన్నెల లాంటి ..

వెన్నెలలాంటి ఆమె భుజాలమీంచి నల్లనిత్రాచు మెల్లగా ప్రాకి పొంగుతున్న గుండెల మీద ఊగిసలాడే
పూలదండనివాసన చూసి సన్ననడుంని చుట్టూరా చుట్టుకొని నాభిలోకి జారిపోగానే తెల్లని ఓ పూమొగ్గ బిగుసుకున్న రేకుల్ని సౌమ్యంగా విప్పుకుంటూ కెవ్వునపెట్టినకేకకి గుడి శిఖరం మీద అటునిటు తిరిగే
పావురాయి కువకువ లాడుతూ వేకువని ముక్కున కరచుకొని ఆకాశాన్ని పొడుచుకుంటూ పడమర దిక్కుకి
సూటిగా చూస్తూ రెక్కల్ని సారించి నిన్నటి జ్ఞాపకాల్ని విసిరేసింది.

Monday, April 12, 2010

జొన్న చేను

మా జొన్న చేను
ఆకలిని జయించే
ఆయుధాన్ని విసుర్తోంది.
---------------
మా జొన్న పంట
పిట్టలకింత పంచి
ఇంటికొచ్చింది .
-------------
మా జొన్న చేలల్లో
ఇంకా దిష్టిబొమ్మ ఉంది
ఎంత భాద్యత ..!

Wednesday, April 7, 2010

పిట్టలు

రెక్కలోచ్చాక
లెక్కలేస్తోందిపిట్ట
కొత్తగూటికి
------------
రెట్టను వేసి
ఎటో చూస్తింది పిట్ట
పెట్టింది పని.
--------------
బాణం గురి తప్పింది
పిట్ట ఆనందానికి
రెక్కలు చాల్లేదు.
---------------

Friday, April 2, 2010

ఇచ్చుకోని..

నన్నునీకు ఇచ్సుకోనీ
ప్రేమగీతి విచ్చుకోనీ !
ఎదలోపలి మమతలన్నీ
నీ పాదాల సమర్పించుకోనీ ..!!
౦౦౦౦౦౦౦౦౦౦౦౦౦
నేన్నీకు ఎమౌతానని
ఇన్నిన్ని పువ్వులు
దోసిట్లో పోస్తావు..!?
నేన్నీకు ఎమీకానని
తెలిసాక నిర్దయగా
చీకట్లోకి తోస్తావు.. !!
0000000000000

Thursday, April 1, 2010

రాసుకున్న పాట..

ఆకాశం
ఓ పాట రాసుకుంది
అది వెన్నెలై కురుస్తోంది.
========
విచ్చిన పువ్వు
ఓ పాట పాడుకుంది
తోట పరిమళించింది.
==========
పడవ
రాసుకున్న పాటని
అలలకిచ్చింది.
--------

Wednesday, March 31, 2010

అలల్లో..

మనసు నది
ఎటో ప్రవహిస్తోంది
అలల్లో ఆమె.
---------------
పూలరంగుల్ని
సీతాకోక చిలుక
మోసుకెల్తోంది .
------------
కత్తిని చూసి
మేకపిల్ల, చెవుల్ని
అల్లాడించింది .
-------------

Friday, March 26, 2010

కొత్త ముగ్గు ..

చాలా రాత్రయ్యాక చూస్తే
చంద్రుడు చుక్కలెడుతున్నాడు
కొత్త ముగ్గు కోసం..
---------------
నల్లమబ్బు వాల్జడ
జాబిల్లి మల్లి
రాత్రికి వెన్నెల ..పూల్జడ
----------------
ఓ రాత్రి ..ఓ పగలు
రాత్రి వెన్నెల ధగధగలు
వెన్నెలకి పగలంటేపగ.
-----------------

Wednesday, March 24, 2010

పూలు

పచ్చని చెట్టు
కొమ్మలన్నీ పూలతో
కావ్య సంపుటి.
-------------
పూలు రాలాయి
ఉన్న కొన్ని క్షణాలు
పరిమళించి.
------------
పొన్నాయి పూలు
కవినేదో అన్నాయి
పొంగి పోయాడు.
----------------

Monday, March 22, 2010

మ్రోగింది వీణ ..

మ్రోగింది వీణ
కొనగోటికి రాగం
ఋణపడిందా ..!?
-----------
ప్రపంచమొక
కవితా సంకలనం
చదవాల్సిందే .
-------------
రెప్పల తడి
చుట్టూరా అక్షరాలు
కవినైనాను .
--------------

Saturday, March 20, 2010

సిరా ఒలికి..

సిరా ఒలికి
అక్షరాలూ తడిసాయి
రాసుకున్న కవితల్ని
కలం మర్చి పోయింది.
కానీ..కాలం నేమరువేస్తోంది.
---------------------
మౌనంగా ..
తెలియనివెన్నో
తెలిసీ తెలియని తలపుల వెనుక
తెరిసీ తెరియని తలుపుల వెనుక
మృదువుగా చప్పుడు చేస్తున్నాయని
మౌనంగా ఉంటేనేగాని ....తెలియలేదు.
రెప్పల వెనుక
మహానదులున్నాయని
ఒక్క కన్నీటి చుక్క
జారేంతవరకు తెలియలేదు.
కలం కదలికల వెనుక
కోటి అక్షరాలూరగుల్తున్నాయని
కవిత పొంగే వరకు తెలియలేదు.
పదునెక్కిన ప్రేమ
కత్తిలా గుచ్చుకుంటుందని
ఆమె చూపులు కలిసెంత వరకు తెలియలేదు.
ఊహల ఊయల వెనుక
కదంతొక్కే లక్షలాది అక్షరాలూ
ఎగసి పడతాయని
దీర్ఘ కవితకి చిరు శీర్షిక
అలవోకగా
జాలువారెంత వరకు తెలియలేదు.

Friday, March 19, 2010

వరల్డ్ హౌస్ స్పారో డే..!

నిన్న వెళ్ళిన
పిచ్చుక రానేలేదు
గూడు గుబులు..!
---------------
మా పొలానికి
పిచ్చుకల కాపలా ..
ఎప్పటి ఋణం..?
-------------
పిచ్చుకలన్నీ
నిన్నటి జ్ఞాపకాల్లో
ఎగురుతున్నై..!
--------------

Wednesday, March 17, 2010

లోపలి మొక్క ..

నా లోపల
ఒక మొక్కను నాటాను.
అది చెట్టయింది .
కొన్ని ఊహలు పూచాయి
అవి సీతాకోక చిలుకలతో కలసి
ఎగిరి పోయాయి హాయిగా..
కొన్ని పూవులు పూచాయి
పరిమళాల్ని లోకానికిచ్చి
కొత్త రంగుల్ని కోరుకుంటున్నాయి .
కొన్ని పక్షులు వాలాయి
అవి నిరంతరం గుసగుస లాడుతూ
కొత్త సంగతులు చెప్పుకుంటున్నాయి .
కొంతమంది కవులు నీడన చేరారు
కవిత్వమంటూ ఏమీ చెప్పలేదు కానీ...
కన్నీటి భాషలో మనసుని రాసుకుంటున్నారు
కొందరు మాత్రం మెరిసే కళ్ళతో
ఇంద్ర ధనస్సును చెట్టుకు కట్టే ప్రయత్నంలో ఉన్నారు,
ఆడుకునే పిల్లలకిద్దామని ..
నాలోపల
చాలా మొక్కల్ని నాటాను
ఎప్పుడు చూసినా ఏవో జ్ఞాపకాలు
అక్షరాలుగా అల్లుకోవడం చూస్తున్నాను.
అసలు ..నేను మొక్కలోపల ఉన్నానా!?

నీ జ్ఞాపకాలే నా ప్రాణం....వాటితోనే నా ప్రయాణం: నువ్వున్నావు...నీ జ్ఞాపకాలున్నాయి

నీ జ్ఞాపకాలే నా ప్రాణం....వాటితోనే నా ప్రయాణం: నువ్వున్నావు...నీ జ్ఞాపకాలున్నాయి

రాలిన అకు

రాలిన ఆకు
పచ్చని జ్ఞాపకాల్ని
కొమ్మకిచ్చింది.
--------------
ఆకు రాలింది
రాసుకున్నపాటల్ని
కొమ్మలకిచ్చి.
--------------
రాలిన ఆకు
ఏమీ చెప్పనే లేదు
రెమ్మలకైనా.
--------------

Sunday, March 14, 2010

వెన్నెల రాత్రి..

వెన్నెల రాత్రి
వేణువుని ఊదాను
ఆమె రాలేదు.
-----------
వెన్నెల రాత్రి
పాటరాని క్షణాన్ని
విసిరేసాను.
------------
రాత్రి, వెన్నెల,
పిల్లనగ్రోవి పాట..
కలవలేదు.!
-----------

Saturday, March 13, 2010

కొమ్మ-కోకిల

ఎగిరిపోతూ
కోకిలోకపాటని
కొమ్మకిచ్చింది.
------------

-------------
ఎందుకోగాని
కొమ్మలన్నీవాడాయి ..
ఏదీ కోకిల?
--------------
కోకిలవస్తే
కొమ్మలు పాడతాయి
పూతమరచి.
-----------

Friday, March 12, 2010

కొమ్మలు కొన్ని

కొమ్మను వంచి
కొన్ని పువ్వుల్నికోసా
రేపురాకంది.
---------------
కొన్ని పువ్వులు
కోకిల పాటవిని
రాలనన్నాయి .
-------------
కొన్నిపువ్వులు
కొమ్మలచాటున్నాయి
గాలి రాల్చింది.

యంత్రం..

తెల్లారగానే
ఆమె రోబో అవుతుంది.
ఇంటిపనులు అన్నింటినీ పూర్తీ చేస్కొని
సర్వీసు ఆటోల్లో మృగాళ్ళ మధ్య
ఆర్టీసి బస్సుల్లో వత్తిళ్ళ మధ్య
ఎలాగోలా ఆఫీసుకు టైముకు చేరి
టికు టికు మంటూ టైపు మషీను అవుతుంది,
తలకూడా ఎత్తకుండా కంప్యుటరు అవుతుంది.
సాయంత్రం వస్తూ వస్తూ కూరలసంచి గా మారి
నీరసంగా ఇంటికి చేరి గుక్కెడు నీళ్ళు తాగుతుంది.
అలసటను దాచిపెట్టి చురుకుదనం తెచ్చుకొని
బయటనుండి వచ్చిన భర్తకి వేడివేడి కాఫీ ఇస్తుంది.
చంటి గాడి హోం వర్క్ అంతా చూసి, వీలుంటే తనే మొత్తం చేసేసి,
చిన్న దాన్కి మాత్రం అంట్లు పడేస్తుంది.
ఆడపిల్ల లు పని చేస్కో పొతే ఎలా? అని
పాత పాఠాలు నూరిపోస్తుంది.
రాత్రిళ్ళు ఎలాగో కలత నిద్ర పోతుంది.
కలల గూళ్ళు చెల్లా చెదురు అవుతున్నా
మౌనంగా చీకటి రాత్రుల్ని భరిస్తుంది.
----
తెల్లారగానే
మళ్ళీ యంత్రం మెల్లగా, మౌనంగా
పని చేయడం మొదలౌతుంది.
గ్యాస్ ధర పెరిగినా, కరెంటు లేకపోయినా
ఈ యంత్రం పని చేయాల్సిందే ..!
పగలు-రాత్రి ఆడటమే కాని
ఆగటం తెలీదు.
కష్టాలను చెరిపేసుకొని ,కన్నీళ్ళని తుడిచేసుకొని
అందరికీ కనిపించే ఈ యంత్రం పేరు 'మహిళా'
అమ్మ అని , భార్య అని లేబుల్స్ తో వస్తుంది.
ప్రేమకు మారు పేరు --క్షమకు మరో పేరు
అని అప్పుడప్పుడు కాస్త పొగిడితే చాలు ..
ఈ యంతం ఎన్ని ఏళ్ళు అయినా పని చేస్తుంది భలేగా.
అదే అసలు మంత్రం..
ఎన్ని బడ్జెట్లు వచ్చినా దీని ధర పెరగదు-తరగదు.
ఏమైనా రాయండి-ఎన్నైనా చెప్పండి-
ఆమె లేకపోతె మన బ్రతుకు -వరదలో మునిగిన పంట పొలం
కళ్ళెదుట ఉండే దేవతా శిల్పం.
కుటుంబ బంధంలో ఆత్మీయత వెదజల్లే సాస్వత సౌగంధ సౌరభం.
కూరల సంచినే కాదు..
కారల్ మార్క్స్ కి జన్మ నిస్తుంది..లెనిన్ కి ఆలోచన యిస్తుంది.
రవీంద్రునికి గీతాంజలి నిస్తుంది.
ఒక బాలమురలికిసుస్వరాన్ని యిస్తుంది.
వేమన చేతిలో పద్యమై మెరుస్తుంది.
శ్రీ శ్రీ కి అక్షరం నూరి పోస్తుంది.
------ఎన్ని దుర్మార్గాలు చేసినా
దీపస్తంభంలా వెలుగులు పంచుతుంది.
ఆమెను ఆదరిస్తే చాలు ..మనిషిగా చూసినా చాలు .
ప్రతి రోజు మనకి ఉత్సవ వాతావరణం కల్పిస్తుంది.

Thursday, March 11, 2010

బలపం..

బడి..హైకులు

బలపమిచ్చా
రెండు జెళ్ళ సీతకి
నే గుర్తుంటానా..?
------------
బడి గంటని
ముందే కొట్టినందుకు
చేతిలో టీ .సి.
---------
స్కూలుకు వెళ్తే
జైలుకు వెళ్ళినట్లే ..
ఆడనివ్వరు..!
-------------

బొమ్మ

తనే బొమ్మ
మరో బొమ్మనిమ్మని
ఏడుస్తూ పాప .
--------------
చిట్టి పిడత
పాప వండి పెడితే
లొట్ట లేసాను.
--------------
బొమ్మల పెళ్లి
ఊరంతా సందడంట..!
మీరు రాలేదు.

Wednesday, March 10, 2010

తీపి గుర్తులు..

వొరిగిన చెట్లు
చెదిరిన దృశ్యం
సుడిగాలి ఆనవాళ్ళు ..!
జారిన తీగ
రాలిన పూలు
చిరుగాలి తీపిగుర్తులు ..!!

Tuesday, March 9, 2010

నువ్వు లేనట్టే ......

తడికళ్ళతో
ఆమె నిలబడితే
నువ్వులేనట్టే ..!
------------
ఆమె కళ్ళల్లో
సన్న కన్నీటిపొర
నువున్నా..లేవు.
-------------
తడి కళ్ళని
ఆమె దాచుకుంటోంది
లేనట్టే ..నువ్వు.

Sunday, March 7, 2010

అనువాద హైకు..

కాకి ఎగిరి
మోడుమీద వాలింది
తోడు వచ్చిందా..?
నత్సుమే ..జపనీ ..
----------------
చీమను చంపాను
పిల్లలు చూసేసారు
సిగ్గుపడ్డాను .
కతో ..జపనీ ..
-------------
కోకిలపాట
కుహు..కోహూ అన్నాయి
రెండు కొండలు.
శిరో..జపనీ..
------------

అనువాద హైకు..

Friday, March 5, 2010

మట్టి కాళ్ళు..

తొలివేకువ
చీకట్ని చీల్చుకుంటూ
మొలకెత్తింది.
-----------
మట్టికాళ్ళకు
పులకరిస్తూ నేల
పంటనిచ్చింది.
------------
చేలోకి వెళ్తే
పలకరిస్తూ కొన్ని
కల్లుముంతలు.
----------

ఆమె..ఆమని..

ఆమెను చూసి
కొమ్మల్లో కోకిలమ్మ
"కుహూ" అన్నది.
*************
ఆమె వచ్చాక
రాలిన పూవులన్నీ
కదుల్తున్నాయి .
*************
ఆమె వెళ్ళాక
ఆమని వచ్చినట్లు
గుర్తులున్నాయి.
*************

Wednesday, March 3, 2010

...అంటే!

కవిత్వమంటే
కంటతడిని తుడిచే
వేళ్ళ కోసం
వెతుకులాట..!

వెళ్ళ నివ్వవూ ..

చిట్టి చేమంతి
నాకో మాట చెప్పింది
నేను చెప్పను.
-------------
రాత్రి మల్లెలు
ఎన్నెన్ని కబుర్లని..
చెప్పనివ్వవు.
-------------
విరజాజులు
విచ్చుకున్నాక చూడు ...
వెళ్ళ నివ్వవు .
---------------


Tuesday, March 2, 2010

అరుస్తూ పక్షులు..

అరుస్తూ పక్షులు ..
పొద్దు పొడిస్తే ...కూటి కోసం !
పొద్దు గడిస్తే ....గూటి కోసం !!

Thursday, February 25, 2010

ఆమె ఎవరు..?

ఆమె ఎవరు..?
ఇంనిన్ని భావాలకు
ఊపిరి పోస్తూ..!
---------------
ఆమె సరేలే
అనగానే కవిత
పొంగి పొర్లింది.
---------------
ఆమె లేకుండా
అక్షరావిష్కరణ
వల్ల కాలేదు.

ఎటో తీస్కెళ్ళి..!

ఏటి ఒడ్డున సాయంకాలపు గాలి ఎటో తీస్కెళ్ళి..! ---------------
గోదారి ఒడ్డు తోడొచ్చిన పడవ ఎటోతీస్కెళ్ళి..! ---------------- తెరచాపలు చెలరేగుతూ గాలి ఎటో తీస్కెళ్ళి..!

Wednesday, February 24, 2010

కొమ్మను ..

కొన్ని మొగ్గలూ
ఒక పువ్వు -కొమ్మను
అమ్మను చేస్తూ..!
-------------
పూలగుత్తులు
నేలపై తారాడుతూ
సేదతీరుతూ..!
----------
మంచుపువ్వులు
ఆకు అరచేతిలో
ఉండిపోనివ్వు..!

అమ్మ ..

అమ్మకు..
పెంకుటిల్లు ..తాజ్ మహల్
వంటిల్లు..రాజధాని
పెరట్లో బృందావనం
వరండా ..ఊరందరికీ ఇల్లు
పని వొత్తిడిలో ..దీపస్తంభం
వెళ్ళిపోయాక ..ఆమె సర్వాంతర్యామి ..
-------------------------
మిత్రుడు /కవి ..స శ్రీ కి
-------------------------

Tuesday, February 23, 2010

విల్లంబు..

వొంగి ఉన్నానంటే
నీకు లొంగి ఉన్నానని కాదు అర్ధం..
విల్లంబునౌతున్నానని అర్ధం.
నీవైపే ..గురి పెట్టబడుతున్నానని అర్ధం.

Monday, February 22, 2010

పిల్లలా .? పోయిట్రీ నా..?

నీకు
పిల్లలు ఇష్టమా ..పోయిట్రీ నా ?
రెండూను..
పిల్లల్ని చూడు ..
వాళ్ళ కళ్ళల్లో ..నా కవిత్వం ధగ ధగా మెరుస్తోంది ..!
కవిత్వాన్ని చూడు ...
ప్రతి అక్షరంలో ..పిల్లలు మిల మిలా మెరుస్తున్నారు..!!

Saturday, February 20, 2010

వెండి వెన్నెల- ఆరు హైకులు

మంచు రేణువు
పచ్చని చిగురాకు
హైకు మెరుస్తూ ..!
.........................
ఏటి అలలు
చిరుగాలి పాటలు
హైకు చేరింది.
.........................
గోరింటాకు
పాప చిట్టి చేతులు
హైకు పండింది.
.......................
వెండి వెన్నెల
చల్లని రాత్రి జోల
నిద్రలో హైకు.
....................
అక్షరాలకి
కవిత్వాన్ని అద్దితే
వచ్చింది హైకు.
....................
అ ఆ యి ఈ లు
దిద్దుకుంటున్న పాప
కావ్యమై హైకు.
........................
అక్షరాలకి
కవిత్వాన్ని అద్దితే
వచ్చింది హైకు.
......................


బాల్యం..

బాల్యం
నేను చాన్నేళ్ళ క్రితం
పారేసుకున్న బొమ్మ.
--------------
జీవన కావ్యం
మొదలయింది
ముందుమాట బాల్యానిదే ..!
---------------
బాబుకి
అంతా నాపోలికే ..
నా బాల్యం నన్నల్లుకుంటోంది.
--------------------

Thursday, February 18, 2010

తెగిన చెప్పు..!

తెగిన చెప్పు..!
నా బ్యాంకు బాలన్సుని
తెగ చెప్తోంది.
---------------
తెగిన చెప్పు
ఎన్ని కుట్లు పడినా
బాధపడదు.
--------------------
తెగిన చెప్పు
ఆమె నవ్వి లోపల
విడవమంది .
-------------

Wednesday, February 17, 2010

ఆమె మరీను.!

ఆమె మరీనూ..!
కొన్ని అక్షరాల్నిచ్చి
హైకు ఇమ్మంది.
-------------
ఆమె వెళ్ళింది
కొన్ని చరణాలకి
పల్లవి నిచ్చి.
--------------
ఆమె రాలేదు
ఇప్పుడు కవిత్వంగా
ఉన్నట్లు ఉంది.
---------------

Tuesday, February 16, 2010

గది లోపల..!

అంతపెద్ద ఆకాశంనించి
చందమామను దించి
కొన్ని నక్షత్రాలను తుంచి
పాపాయికివ్వలనుకున్నా .!
.....అర్ధరాత్రి వెళ్లి చూస్తే
అసలు ఆకాశమే లేదు ..
తీరా నా గదిలోపల కెళ్ళి చూస్తే
పాపాయి ఆడుకుంటోంది
చందమామతోనూ
కోటి నక్షత్రాలతోనూ..!

Saturday, February 13, 2010

మరికొన్ని మల్లెలు..!

నేల రాలాయి
తీగచాటు మల్లెలు
తీరింది ఋణం.!
----------------
ఒంటరి మొక్క
ఒక్క మొగ్గను వేసి
తెగ పూస్తోంది .
------------
మల్లె రాలింది
మనసదోలా ఉంది
మొగ్గ-ఓదార్పు.
-------------

కొన్ని మల్లెలు..!

మల్లెనవ్వింది
ఆమెమళ్ళీనవ్వింది
బావుందీ రోజు..!
-----------
మల్లెలువిచ్చి
కవికేదో ఇచ్చాయి
హైకూలు నచ్చి..!
-------------
తీగ సాగుతూ
దేన్నో వెతుకుతోంది
మొగ్గ నవ్వింది.
---------

Thursday, February 11, 2010

ఎన్ని మల్లెలో..!

మల్లె పువ్వులు
పాపనవ్వులు --చాలు
హైకు కవికి .
_____________
నేను నవ్వాను
ఆమె కూడా నవ్వింది
ఎన్ని మల్లెలో..!
_____________
మూర మల్లెలు
మనసు మూలల్ని
వసంత పర్చాయి .
____________

Wednesday, February 10, 2010

ఉంటాననే..! హైకూ ..

ప్రాణ మిత్రుడు
ఉంటాననే వెళ్ళాడు
గుండెను పిండి !
***********
కవి మిత్రుడు
ఉంటానంటూ వెళ్ళాడు
హైకూ ఓదార్పు..!
***********
ఆమె వెళ్ళింది
ఉంటాననే చెప్పింది
ఎప్పటిలానే..!

Monday, February 8, 2010

ఆమె చూపులు..!

* ఆమె చూపులు
వెచ్చని చెలిమిని
పంచి ఇచ్చాయి..
***
* ఆమె చూపులు
మనసు లోతుల్లోకి
దిగుతున్నాయి.
***
* ఆమె చూపులు
కలసిన చోటల్లా
కావ్య సుధలె..!
***
* ఆమె చూపులు
నేనుని చెరిపేసి
మనమే నంటూ ..!
***
* ఆమె చూపులు
కొన్ని కవితలకి
ముగింపు నిస్తూ ..!
***
* ఆమె చూపులు
పొంగుతున్న చీకట్ని
వెన్నెలించాయి .

Sunday, February 7, 2010

మా అమ్మాయి ..

మా అమ్మాయి
------------
మా అమ్మాయికి
ఓ ఘంటసాలా.. సుశీలా లేరు
బాలమురళినా? ఎక్కడో విన్నట్టు గుర్తు
రవివర్మ ? ..పేరు బాగుందే
బిస్మల్లఖాన్..! ...ఓ ముస్లిం కదూ
సుబ్బులక్ష్మి.. ఇదేమి పేరు?
మాయాబజార్? రైతుబజార!
****------****-----***
మా అమ్మాయికి ...ఇప్పుడంతా--
ఇంటరు నెట్లు ..చాట్లూ
సెల్లులు ..ఎస్సేమ్యేస్సులు
లాపు టాపులూ..ఇపాడులు..
పబ్బులూ ..ఫాస్ట్ బీట్లూ
కంప్యుటరులో గేములూ ..పైరసీ సీడీలు
మా అమ్మాయికి కొన్ని లేవు..!.
లేనివి ..అపురూపమైనవి ..
ఉన్నవి..? నో కామెంట్..
--

Wednesday, February 3, 2010

వెన్నెల ..!

చప్పుడు లేని చీకటి
మౌనాన్ని దిగమింగుతూ గది
మూలగా దీపం వెలుగుతూ ..
లీలగా ఆమె రూపం ..దీపం వెల్తుర్లో ..
వెనుక అగరొత్తుల పొగ సాగుతూ
వొత్తైన ఆమె కురులని సర్దుతూ అతని వేళ్ళు
మెరుస్తోన్న చెమట చుక్కల్ని తుడుస్తూ ముని వేళ్ళు
కరుగుతున్న కుంకుమ అతని వేలిపై
గోడపై రెండు నీడలు --ఒకటి ఔతున్నట్లుగా
అదిరిపడే పెదవులు మెల్లగా ముడుచుకుంటూ
పెదవులపై తారాడుతూ పెదవులు
మళ్ళీ దీపం వైపు ...
దీపం మెల్లగా వణికి పోతూ
మెల్లగా వెలుగు చీకట్లోకి జారుతూ
ఇంకా మెల్లగా చీకటి వెలుగులో కరుగుతూ
మెల్లగా సాగే నల్లని మబ్బేదో
వేల్లువౌతున్న వెన్నెల్ని
మృదువుగా ముంచేస్తూ..

-



వెన్నెల్ని మృదువుగా ముంచేస్తో..


Tuesday, February 2, 2010

రాత్రి ఏం చేస్తుంది?

* రాత్రంతా రాత్రి ఏం చేస్తుంది?
రేపటి ఉదయాన్ని రాగ రంజితం చేయడాన్కి
తాపత్రయ పడుతూ ఉంటుంది.
-------------------------
* కనురెప్పల దూరం -ఇంత
కనువిప్పుకు లోకం -అనంత
--------------------------
*కలం - నా హలం
కాగితం - నా పొలం
కవిత -అందరి ఫలం
--------------------------

ఏ కవి చల్లాడో

* ఏ కవి చల్లాడో
వేల అక్షరాలు
నెల పచ్చని కవితనిచ్చింది .
------------------
* పంజరాన చిలక
అటునిటు తిరుగుతూ
రెక్కలకి అర్ధం వెతుకుతోంది.
----------------------
* గొంగళి పురుగుకి
నిద్ర చెడింది - రంగుల కలలన్నీ
రెక్కలు విప్పుకున్నాయి.
-----------------------
*చెట్టు కూలింది ..!
నేలతల్లి నీడను కోలు పోయింది

చిలకలన్నీ జ్ఞాపకాల్లో.
-----------------

Saturday, January 30, 2010

ఆమె ఎవరు?

ఆమె చూసింది
నాకిపుడు కవిత్వం
కొత్తగావుంది .
------------
ఆమె రాకకి
రాగరంజితమైంది
కవి మనసు.
--------------
మౌన భాషిణి
అంతరంగాన ఆమె
రాగ రాగిణి .
------------
ఆమె నవ్వింది
మల్లె మళ్ళీ నవ్వింది
బావుందీ రోజు.
--------------
ఆమె లేదని
అనుకుంటాను కాని
మనసైనది.
--------------
ఆమె నవ్వింది
లోపలి గాయాలన్నీ
మాసి పోయాయి .
---------------

కంట తడి

నా కంట తడి
దిండుకు తెలుసు -నీ
గుండెకేం తెలుసు??
-----------------
బాధగా వుంది
నాకో నది కావాలి
ఏడవ దాన్కి!
---------------

Friday, January 29, 2010

శ్రీ శ్రీ బుల్లెటేన్

శ్రీ శ్రీ భావాలు /సాగు చెయ్యడం /శ్రీ శ్రీ అభిమాని విధి.

శ్రీ శ్రీ భావాలు/ పోగు చెయ్యడం /శ్రీ శ్రీ సాహిత్య నిధి.

'మహా కవి శ్రీ శ్రీ బులేటేన్' సంపుటి-౧ విడుదల అయ్యింది.

సంపాదకుడు; శ్రీ సింగంపల్లి అశోక్ కుమార్.

ప్రగతి తవోర్స్ ..మారుతి నగర్ ..విజయవాడ -౪

Thursday, January 28, 2010

ఒక స్పర్శకి ..!

ఒక స్పర్శకి.....
దేహ పుష్పం విచ్చుకోవచ్చు.!
మొగ్గలా ముడుచుకోవచ్చు..!!

మౌన భాష్యం రాగమయం కావచ్చు.!
విలయానంతర నిస్సబ్దమూ కావచ్చు..!!

అరమోడ్పు కనులు కాంతివంతం కావచ్చు.!
విధ్వంసానంతర బీభత్స దృశ్యం కావచ్చు..!!

లాలనగా జీవన కావ్యం మొదలు కావచ్చు.!
జ్వలించే అగ్ని శిఖలా ప్రజ్వరిల్లవచ్చు ..!!

క్షణంలో
ఒక స్పర్శ ......
రెండు విలక్షనాలుగా
విడి పోవచ్చు ..!!


శ్రీ శ్రీ ..శ్రీర్షిక

శ్రీర్షిక
------
శ్రీ శ్రీ కంటే ముందు .. పద్దెనిమిది పర్వాలు పర్వెట్టాయి
శ్రీ శ్రీ కి వెనుక --ముందు విలక్షణ వాక్యాలు కావ్యాలై ఉద్యమించాయి ..
శ్రీ శ్రీ కి ఇరువైపులా నిలబడ్డారు --పతితులు, భ్రష్టులు
తుడుచుకుంటూ తడి కళ్ళని ..!

శ్రీ శ్రీ కి అన్నివైపులా ఎగరేసారు - కవులూ,కళాకారులూ .. ఎత్తిన పిడికిళ్ళని!

శ్రీ శ్రీ అన్న పేరు
తెలుగు కవితా సంకలనానికి సంచలన శీర్షిక !
శ్రీ శ్రీ కవిత్వమే
తెలుగు సాహితీ జగత్తుకి గొప్ప జ్ఞాపిక !!

Saturday, January 23, 2010

ఆమె నం.2

ఆమెను తలచిన మరు క్షణమే - నా లోపలి దీపాన్ని వెలిగించి
మనసు మూలల్ని కాంతివంతం చేస్తుంది .
ఆమె అధర స్పర్శ..నాలోని ..లోలోని మౌన రేణువుల్ని
మెత్తగా కరగిస్తుంది .
అనుకోని ఆమె చూపుల దీపశిఖ
నన్ను మరింతగా వెలుగు పరుస్తుంది.
దూరపు అపరిచిత నీలి నీడల్ని దగ్గరతనం చేస్తుంది.
ఇంకా ఇంకా చాలా చాలా దగ్గరగా జరిగి కరిగి
ఇంక చాలని
అక్షరాలని దోసిట్ల పోసి ...దాచుకోమంటుంది.

ఆమె నం.1

ఆమె
నా మనసుని అలికి ముగ్గేస్తుంది .
చిరుకోపంలో అలిగి దూరమైనట్లుగా దగ్గరౌతుంది.
చీకట్లని చెదరకొట్టి నిలువెల్లా వెన్నెలౌతుంది.
ఎదను నిమిరి మెల్లగా కవిత్వమౌతుంది .
తెల్లారేసరికి నా కవితకి లాలనగా కొత్త శీర్షిక నిచ్చి
చిలిపి జ్ఞాపకాల్లోంచి నెమ్మదిగా ఇంటిపనుల్లోకి జారిపోతుంది .
పగలంతా పమిట కొంగులా చుట్టేసుకుంటుంది.
ఆమె నేనుగా -నేను ఆమెగా తనలో తను నవ్వేసుకుంటుంది.

Friday, January 22, 2010

పిచ్చుకలు

//

  1. నన్నే చూస్తోంది/ తల్లిలేని పిచ్చుక /దోసిలయ్యాను.
  2. పిచ్చుక గూడు /తుమ్మ చెట్టుకుతోడు/ ఇప్పుడులేదు .
  3. పిచ్చుకవస్తే /ఓ ఇల్లు కడతాను/ ఎప్పటికైనా .
  4. ఒకటే వాన /తడుస్తూ గూళ్ళు -అన్నీ కిచకిచలె.
  5. కొమ్మలనిండా /పిచ్చుకలు వాలాయి /ఊగింది చెట్టు .
  6. వడ్ల గింజని/ గొంతులోకి లాగింది /తీరిందాకలి .
  7. కుడిరెక్కతో/ ముక్కుని గీరుతోంది /చిరాకేందుకో ?
  8. రెండో పిచ్చుక / వచ్చి వాలింది -గూడు ఊగుతూ ఉంది.

బుల్లి పిచ్చుకలు

  1. బుల్లి పిచ్చుక/చిన్న పుల్లను తెచ్చి / తల్లికిచ్చింది .
  2. బుల్లి పిచ్చుక /దోసిట్లో నీళ్ళు తాగి /రెక్కలూపింది .
  3. బుల్లి పిచ్చుక/ధ్యాన ముద్రలో స్వామి /రెట్ట వేసింది.
  4. బుల్లి పిచ్చుక /ముందొక పెద్ద గద్ద/ అ యి తే ఏంటి ?

Tuesday, January 19, 2010

రాత్రి

ఉదయం పరుషంగా ఉంటుంది
కాఫీ కప్పు కర్కశంగా అరచేతులో మోగుతుంది
మనసుని ఓ మూలకు ఊడ్చేస్తూ
ప్రేమను ఓ పక్కన పెట్టమంటుంది
ఆమె - ప్రతిఉదయమ్ ఇంకోలా ఉంటుంది
రాత్రికి మాత్రం - పూలుపెట్టుకున్న యంత్రంలా ఉంటుంది. .
యంత్రం వేడికి కొన్ని పూలు మనసు లేని చోట పడి మాడిపోతాయి..
చూస్తూన్నకొద్దీ
ఎందుకు చూడాలనిపించదో అర్ధం కాక
సంసారం చట్టుబండలై కొన్ని కెరటాలని తట్టుకుంటూ అలా ఉండిపోతుంది
రేపటి ఉదయం ఇంకెలా ఉంటుందోనని భయంగా తెల్లారుతుంది
మసకబారిన వెన్నెల
వాసన లేని మల్లెల సాక్షిగా
క్రితం రాత్రి యంత్రం బాగానే పనిచేసింది
రేపటి ఉదయం ఇంకోలా ఉంటుందా?

Sunday, January 17, 2010

ఆమె వస్తే..

ఆమె వస్తే చాలు ...
రాసి పారేసుకున్న పాటలన్నీ ప్రాణం పోసుకుంటాయి
పల్లవులన్ని పొంగి పొరలుతాయి.
ఆమె వెళ్తే చాలు ...
లోపలి అక్షరాలు అల్లాడిపోతాయి
గుండెలోని పాటలు గొంతు దాటనంటాయి .
ఆమె వచ్చి వెళ్ళే లోపు
కాలం- క్షణకాలం ఆగి
అందని భావాలని మనసంతా నింపి వెళ్తుంది.

తుమ్మెద

తుమ్మెద వస్తే చాలు ....
మొగ్గలన్నీ రేకులు విప్పుకుంటాయి
దోసిళ్ళ కొద్దీ మకరందాన్ని సమర్పించుకుంటాయి .
తుమ్మెద వెళ్తే చాలు...
పువ్వులన్నీ చిన్నబోతాయి
కంటతడిని దాచుకుంటూ కొత్త స్పర్శని తలచుకుంటాయి ....
తుమ్మెద-పువ్వుల
క్షణకాల అనుబంధాన్కి పులకరించి
కొమ్మలన్నీ మొగ్గలు తోడుగుతాయి.

........... ------- ..........

Tuesday, January 12, 2010

పొదరిళ్ళు

కొడుకు ఒక నైక్ షూ----నాన్న ఒక తెగిన చెప్పు
కూతురొక చేమ్కి చుడిదార్ --అమ్మ మసిపాత గుడ్డ
అమ్మా నాన్న - రగిలే రెండు కుంపట్లు
పిల్లలేమో పొంగే కలల పొదరిళ్ళు.

Monday, January 11, 2010

పరిమళం

కళ్ళు మూస్తే చాలు ..
చల్లని చీకటి ..మెరుస్తూ చందమామ
జాలువారే పున్నమి వెన్నెల
తళుకులీనుతూ కోటి నక్షత్రాలు...!

కళ్ళు తెరిస్తే చాలు...
వెచ్చని వేకువ ..పక్షుల కువ కువలు
జ్వలిస్తూ కాంతి కిరణాలు
పులకరిస్తూ పచ్చని నేల...!

రెప్పపాటుకాలంలో
జీవనకావ్యప్రవాహం
పరిమళభరిత మౌతున్నవైనం...!!

ఓ బ్లాగులమ్మ

అ. ఇంటరునెట్టు / ఇంట ఓ మూలనెట్టు / కాలంగాడవకపోతే ఒట్టు.../ ఓ బ్లాగులమ్మ.
ఆ. ఇంటరునెట్టు/లోకాలను చుట్టు/ విజ్ఞానానికి మరో మెట్టు..../ ఓ బ్లాగులమ్మ.
ఇ. ఇంటరునెట్టు /అచ్లీలాలు చూపెట్టు/చట్టం చెప్పుతోకొట్టు.../ఓ బ్లాగులమ్మ.

Saturday, January 9, 2010

కత్తులు దాచుకున్న కళ్ళు ఆకాశంలోకి చూపుల్ని విసిరేశాయి. గాయపడ్డ రెండు మెరుపుతీగలు బాధగా మెలికలు తిరుగుతూ తడిసిన మబ్బులచెంపలమీద నించి జారి గుండెల్ని బాదుకుంటూ సాయంత్రంలో గుచ్చుకున్నఇన్ద్రధనసునుఎక్కి ఎటోవేల్లిపోయాయి . నింగీ నీల రెండూ వేరు వేరని చందమామ చుక్కలతో చెప్పిన రహస్యం నేల మీద తుళ్ళిపడే సెలయేళ్ళు విని తీరాన అలలపై తల బాదుకొని సోమ్మసిల్లాయి. ఎర్రని ఎండ , దోసిళ్ళతో నీళ్ళని తోడి పైకి విసిరేసింది. అక్కడో ఆకాశం నీలంగా మెరిసింది. రహస్యం బట్ట బయలు అయిందని చందమామ చుక్కలచాటుకి వెళ్ళేపోయింది.

Thursday, January 7, 2010

వెన్నెలలాంటి ఆమెభుజాలమీంచి నల్లనిత్రాచు మేల్లగాపాకి పొంగుతున్న వక్ష్జోజాల మీద ఊగిసలాడే పూలదండని వాసనచూసి సన్ననడుమ్ని మెల్లగా చుట్టుకొని నాభిలోకిజారిపోగానే , తెల్లని పూమోగ్గ బిగుసుకున్నరేకుల్ని సౌమ్యంగావిప్పుకుంటూ కెవ్వునపెట్టిన కేకకి గుడి శిఖరం మీద అటునిటు తిరిగే పావురాయి కువకువలాడుతూ వేకువని ముక్కునకరచకొని ఆకాశాన్ని పొడుచుకుంటూ పడమరదిక్కుకి సూటిగా రెక్కల్ని సారించి నిన్నటి జ్ఞాపకాలని విసిరేసింది.

ఓ బ్లాగులమ్మ.


ఇంటరునెట్టు/ఇంట మూలనెట్టు / కాలంగాడవకపోతే ఒట్టు/ ఓబ్లాగులమ్మ.


ఇంటరునెట్టు/లోకాలను చుట్టు/విజ్ఞానానికి మరోమెట్టు/ బ్లాగులమ్మ.


ఇంటరునెట్టు / ఆశ్లీలాలు చూపెట్టు/ చట్టం చెప్పెటికొట్టు/ బ్లాగులమ్మ.

Wednesday, January 6, 2010

థాంక్స్.

శ్రీకాంత్, సతీష్ గార్లకి మనఃపూర్వక కృతజ్ఞతలు.

కల

ఈ అక్షర మహాత్సవం శ్రీకాంత్,సతిశగార్ల సాయంతో ఈ క్షణాన మొదలవ్వడం సంతోషంగా ఉంది.