నది ..అలల సవ్వడి

నది ఆవలి గట్టున ఇల్లు .
అక్కడో దీపం దిగులుగా వెలుగుతోంది .
ఓ అనివార్యపు ఒంటరి సాయంత్రంలో
ఇవతల నేను .
.....నీళ్ళు లేని నది
..... కదలని పడవ
..... గాఢమైన నిరీక్షణ
నదిలోకి నీళ్ళు చేరాలి
అలల అరచేతుల్లో పడవ తేలాలి
ఆవలి ఒడ్డుకు చేరాలి...
అప్పుడు కదా
వాకిట్లో నిలబడి
అలల సవ్వడి వింటూ
నది నుదుటిపై
సూర్య కాంతిని చూడాలి!??
..... ఓ
చినుకు పడింది.
ఇప్పుడు మీకు
నది వస్తున్న చప్పుడు వినబడుతోందా??