ఎన్ని మల్లెలో..!

మల్లె పువ్వులు
పాపనవ్వులు --చాలు
హైకు కవికి .
_____________
నేను నవ్వాను
ఆమె కూడా నవ్వింది
ఎన్ని మల్లెలో..!
_____________
మూర మల్లెలు
మనసు మూలల్ని
వసంత పర్చాయి .
____________

ఉంటాననే..! హైకూ ..

ప్రాణ మిత్రుడు
ఉంటాననే వెళ్ళాడు
గుండెను పిండి !
***********
కవి మిత్రుడు
ఉంటానంటూ వెళ్ళాడు
హైకూ ఓదార్పు..!
***********
ఆమె వెళ్ళింది
ఉంటాననే చెప్పింది
ఎప్పటిలానే..!

ఆమె చూపులు..!

* ఆమె చూపులు
వెచ్చని చెలిమిని
పంచి ఇచ్చాయి..
***
* ఆమె చూపులు
మనసు లోతుల్లోకి
దిగుతున్నాయి.
***
* ఆమె చూపులు
కలసిన చోటల్లా
కావ్య సుధలె..!
***
* ఆమె చూపులు
నేనుని చెరిపేసి
మనమే నంటూ ..!
***
* ఆమె చూపులు
కొన్ని కవితలకి
ముగింపు నిస్తూ ..!
***
* ఆమె చూపులు
పొంగుతున్న చీకట్ని
వెన్నెలించాయి .

మా అమ్మాయి ..

మా అమ్మాయి
------------
మా అమ్మాయికి
ఓ ఘంటసాలా.. సుశీలా లేరు
బాలమురళినా? ఎక్కడో విన్నట్టు గుర్తు
రవివర్మ ? ..పేరు బాగుందే
బిస్మల్లఖాన్..! ...ఓ ముస్లిం కదూ
సుబ్బులక్ష్మి.. ఇదేమి పేరు?
మాయాబజార్? రైతుబజార!
****------****-----***
మా అమ్మాయికి ...ఇప్పుడంతా--
ఇంటరు నెట్లు ..చాట్లూ
సెల్లులు ..ఎస్సేమ్యేస్సులు
లాపు టాపులూ..ఇపాడులు..
పబ్బులూ ..ఫాస్ట్ బీట్లూ
కంప్యుటరులో గేములూ ..పైరసీ సీడీలు
మా అమ్మాయికి కొన్ని లేవు..!.
లేనివి ..అపురూపమైనవి ..
ఉన్నవి..? నో కామెంట్..
--

వెన్నెల ..!

చప్పుడు లేని చీకటి
మౌనాన్ని దిగమింగుతూ గది
మూలగా దీపం వెలుగుతూ ..
లీలగా ఆమె రూపం ..దీపం వెల్తుర్లో ..
వెనుక అగరొత్తుల పొగ సాగుతూ
వొత్తైన ఆమె కురులని సర్దుతూ అతని వేళ్ళు
మెరుస్తోన్న చెమట చుక్కల్ని తుడుస్తూ ముని వేళ్ళు
కరుగుతున్న కుంకుమ అతని వేలిపై
గోడపై రెండు నీడలు --ఒకటి ఔతున్నట్లుగా
అదిరిపడే పెదవులు మెల్లగా ముడుచుకుంటూ
పెదవులపై తారాడుతూ పెదవులు
మళ్ళీ దీపం వైపు ...
దీపం మెల్లగా వణికి పోతూ
మెల్లగా వెలుగు చీకట్లోకి జారుతూ
ఇంకా మెల్లగా చీకటి వెలుగులో కరుగుతూ
మెల్లగా సాగే నల్లని మబ్బేదో
వేల్లువౌతున్న వెన్నెల్ని
మృదువుగా ముంచేస్తూ..

-



వెన్నెల్ని మృదువుగా ముంచేస్తో..

రాత్రి ఏం చేస్తుంది?

* రాత్రంతా రాత్రి ఏం చేస్తుంది?
రేపటి ఉదయాన్ని రాగ రంజితం చేయడాన్కి
తాపత్రయ పడుతూ ఉంటుంది.
-------------------------
* కనురెప్పల దూరం -ఇంత
కనువిప్పుకు లోకం -అనంత
--------------------------
*కలం - నా హలం
కాగితం - నా పొలం
కవిత -అందరి ఫలం
--------------------------

ఏ కవి చల్లాడో

* ఏ కవి చల్లాడో
వేల అక్షరాలు
నెల పచ్చని కవితనిచ్చింది .
------------------
* పంజరాన చిలక
అటునిటు తిరుగుతూ
రెక్కలకి అర్ధం వెతుకుతోంది.
----------------------
* గొంగళి పురుగుకి
నిద్ర చెడింది - రంగుల కలలన్నీ
రెక్కలు విప్పుకున్నాయి.
-----------------------
*చెట్టు కూలింది ..!
నేలతల్లి నీడను కోలు పోయింది

చిలకలన్నీ జ్ఞాపకాల్లో.
-----------------