ఖాసీం భాయ్ ..ఓ పావురం..ఓ దీపం

మా పాపకి గాలి సోకితే
మా ఖాసీం భాయ్ తావీదు కడతాడు ..!
ఖాసీం భాయ్ ఇంట్లో కష్టం వస్తే
మరు క్షణం లో నేను నడుం కడతాను...!!
----------------------------
ఓ పావురాయి
మందిరం మీంచి మసీదు మీదికి
మసీదు మీంచి మందిరం మీదికి
చానాళ్లుగా తిరుగుతోంది ..
ఆకలి వేస్తె
నాలుగు గింజల కోసం
ఊరి వైపు ఎగురుతోంది...
------------------
మతములన్ని మాసి పోవును ..
మమతల దీపం నిలిచి వెలుగును ....
--------------------------

కొంచెం ...

కుంచె మొన కొంచెం ..
కదిల్తే రంగుల ప్రపంచం..
==============
కాగితం నా పొలం
కలం నా హలం
కవిత అందరి ఫలం ..!
==============
కనురెప్పల దూరం --ఇంత
కనువిప్పుకు లోకం --అనంత
===============
"అ " అంటే అక్షరం
పదాలుగా కదిలితే కావ్యం
==============
ఒంటరిగా నడిస్తే ..అది నడక
నలుగురితో నడిస్తే --అది బ్రతుకు.
==================
కవిత మొదలైనప్పుడు నీది
ముగుసినాక --అందరిది.
===============

చినుకు

వాన చినుకు
ఎదలోపల పడి
ముంచివేసింది .
************
మంచుమొగ్గలు
గడ్డి పోచలపైన
మెరుస్తున్నాయి .
************
రోజంతా వాన
పనిలో పడి
మునిగింది గది.
*************

చినుకు

జన్మనిచ్చేది ...

జన్మ నిచ్చేది
అమ్మ ఒక్కటే కాదు..
అక్షర౦ కూడా..!
ఈ రోజు నా జన్మ దినం.
యాభై వస౦తాలు నిండిన క్షణం ..
ముందుకు పొతే ముసలి తనం..
వెనక్కి వెళితే పసిడితనం..
ఇలా ఉండిపొతే ఎంత బావుంటుందీ క్షణం..!

ఓ పువ్వు రాలుతు౦ది ....

నన్ను ఈ దారినే వెళ్ళనివ్వండి ..
ఇరువైపులా ఎదిగిన చెట్లు
నన్ను గుర్తుపట్టి
ఇంత నీడనీ -కొన్నిపూలనీ ఇచ్చాయి కదా ..!
---నాదోసిళ్ళ లోంచి
కాసిని నీళ్ళు పోసిన జ్ఞాపకం
నీడలా పరచుకుంది కదా ..!
కంచెవేసి కాపలా కాసానని
పూల పరిమాళాలని పంచింది కదా..!!
----నన్ను మోసు కెళ్ళేపుడు
ఈ దారినే వెళ్ళండి ..
ఒక్క క్షణమైనా
ఓ చెట్టు నీడలో ఆపండి.
తప్పకుండా ఓ పువ్వు రాలుతుంది నాపైన.

వెన్నెలకి తెలుసా?

ఆ రాత్రి
ఏ౦జరిగిన్దొ
జాబిలికి తెలియదు ..కానీ
వెన్నెలకి తెలుసు !
కాటుక కళ్ళని చూసిన
మెరుపుతీగకు తెలుసు !
మల్లెపూలని అడిగితె
జాబిలికే తెలుసు అంటాయి .
ఎరుపెక్కి
బరువెక్కిన ఆమె కళ్ళు మాత్రం
ఎవరికీ ..ఏమీ తెలీదు అంటాయి .