రాత్రి వెళ్తూ వెళ్తూ

 తొలిసంధ్య వెళ్తూ వెళ్తూ
అరుణ కిరణాలతో
చిగురాకుల అంచుల్లో
మంచు బిందువులకి
కిరీటాలని తొడిగింది.
ఇంతలోనే పిల్లలు చెట్టుకింద చేరి
కొమ్మల్ని ఊపి ఊపి
కిరీటాల్ని తొడుక్కెళ్ళారు.

సాయంసంధ్య వెళ్తూ వెళ్తూ
మాఊరి కోనేట్లో
విచ్చుకుంటున్న ఎర్రకలువలకి
ఏదో చెప్పి వెళ్ళింది.
పిల్లలంతా గోచీలు విసిరేసి
కోనేట్లో దూకారు .
సంకనిండా కోటి కలువలతో
ఊరంతా ఊరేగారు.


రాత్రి వెళ్తూ వెళ్తూ
కొన్ని నక్షత్రాలని
మా ఊరి బావిలో చల్లింది.
తెల్లారి పిల్లలు చుట్టూరాచేరి
గులకరాళ్ళు విసిరి చెల్లాచెదురు చేసారు.
 కొన్ని నక్షత్రాలు వాళ్ళ కళ్ళల్లో
ఇప్పటికీ మెరుస్తున్నాయి.